Onte 1694: Pelepau na festa da cereixa

Festa_cereixaAntes de seguir o magnífico pregón de Jacobo Buceta na Festa da cereixa de Beade, escoitamos seis temas do grupo Pelepau, un grupo dunha ducia de mestres percusionistas vigueses que demostran a potencia e a orixinalidade da actual música folclórica de noso. Gustoume coñecer en vivo a enerxía coa que abordaron cada unha das cantigas populares de taberna adaptadas para as voces e percusión tradicionais (tamboril, caixa, cunchas…), nas que é doado identificar a estrutura da treboada arraiana e o aroma de ritmos africanos ou brasileiros de alén mar. Auténtico folclore de fusión, un estourido rítmico e un espectáculo dinámico e moi elegante na presentación. Xaora, sexan cancións populares arranxadas como rumbas ou algareiradas populares como «O vivir en Vigo», Pelepau fai música de festa con raíces, empregando vocalizacións coidadas e percusións moi contaxiosas que convidadan a cantar e bailar. O de Pelepau foi onte un baño de entusiasmo ideal para iniciar unha festa gastronómica que dende hai tres décadas exalta o noso froito máis larpeiro.

0 comentarios

Dejar un comentario

¿Quieres unirte a la conversación?
Siéntete libre de contribuir

Deixa unha resposta

O teu enderezo electrónico non se publicará