"Minimaladas" de Carlos López
/en Autores, Literatura infantil e xuvenil, Premios, Vídeos, Xerais/por bretemasMinimaladas, a obra de Carlos López galardonada co Premio Merlín 2007, recolle oitenta e catro mini historias protagonizadas por animais, nas que destaca a súa orixinalidade e imaxinación. O xurado nestes textos breves (nalgúns casos apenas catro ou cinco liñas) salienta a súa capacidade para evocar imaxes, valéndose dun emprego lúdico da linguaxe, algunhas interesantes referencias literarias e dun tratamento moi innovador da creación lingüística.
Carlos López Gómez declarou, no momento de recibir o premio Merlín, que baixo o título de Minimaladas reuníu unha gavela de relatos moi breves protagonizados cada un deles por un animal diferente. “Por deformación profesional, dada a miña condición de humorista gráfico en prensa, as narracións comparten o denominador común do humor. Foi divertido escribilas; confío en que sexa divertido lelas”.
Vídeo: O blog dos pelachos.
"Illa Soidade" de An Alfaya
/en Autores, Literatura infantil e xuvenil, Premios, Vídeos, Xerais/por bretemasIlla Soidade, a obra de An Alfaya gañadora do Premio Fundación Caixa Galicia 2007, relata a historia de Lucía quen, nunha viaxe en tren cando vai iniciar os estudos de xornalismo, vai rememorando a súa relación con Soa, unha esmoleira a que coñeceu cando pretendía deter unha vaga de insolidariedade cos indixentes que se produce no seu barrio.
Para o xurado do Premio Fundación Caixa Galicia “Illa Soidade é unha novela iniciática na que a personalidade da protagonista, Lucía, evoluciona grazas ao contacto con Soa, que nos descobre unha vida marcada pola paixón e a soidade, con reflexións sobre a autonomía persoal e o respecto polo diferente. A obra retrata a indixencia, afastándose de tópicos e concedéndolle voz a persoas que teñen o seu propio espazo nunha sociedade que habitualmente as silencia. Cada unha delas é unha illa chea de historias nas que raras veces somos quen de introducirnos”.
Vídeo: O blog dos pelachos.
"Cardume" de Rexina Vega
/en Autores, Narrativa, Premios, Vídeos, Xerais/por bretemasCardume de Rexina Vega foi a novela gañadora do Premio Xerais 2007. O texto da información que preparamos foi o que reproducimos:
Cardume presenta a historia familiar e persoal dos sobrevivintes a un tempo caótico, doloroso e triste; a un tempo aberto polo eclipse da República e dos seus ideais. A xuízo do xurado do Premio Xerais, faino dunha maneira certeira e sen vitimismo. A novela retrata un Vigo industrial e atlántico, simultaneamente cosmopolita e provinciano, que é crisol de personaxes que evolucionan, que se relacionan e que medran, e que, en definitiva, logran subsistir ás miserias dunha cidade desacougante.
A narradora comeza a relatarnos a historia no espazo murcho e desalentador do cemiterio civil de Pereiró, partindo do presente para evocar a memoria familiar. Dese xeito logra a caracterización dun período de tempo moi longo que retrata boa parte do século XX a través de varias xeracións, soprendéndonos coa recreación de atmosferas políticas, familiares, industriais, culturais, e retratos da emigración daquela época convulsa que deixou unha pegada imborrable nas persoas que a viviron.
O xurado resaltou tamén “a capacidade expresiva da novela a través dunha lingua poética e metafórica que evidencia unha clara vontade estilísitica”. Cardume reivindica a memoria, a insistencia na memoria como conformación da identidade do presente. “Eu só quixera prolongar un pouco máis a permanencia, atrasar o devalo destas vidas menores”, afirma a voz narradora da novela.
Rexina Vega, cando soubo que a súa obra fora premiada, declarou que “esta é unha primeira novela, una primeira novela serodia, que chega cando xa vai fóra a mocidade. Este libro está escrito mentres os nenos, os meus nenos, dormían. Desde que teño uso de razón quixen ser escritora e tardei moito, tanto que crin que ese desexo ía apodrecerme dentro. Quixen probarme por fin na escritura de ficción, liberarme das trabas da eséxe, do saber institucional ao que estaba afeita na escritura da crítica e do ensaio, e deixei, por primeira vez, que a escritura fose algo libre e gozoso, un discurso non vicario”.
Con respecto a novela gañadora definiu Cardume, banco de peixes, como “un álbum de recordos novelados, un libro feito de memoria e de reescritura da memoria. Combinando información e invención, a novela pretende establecer unha autobiografía a través da reconstrución de persoaxes aos que só se coñece por medio dos relatos familiares. Trátase da busca de sentido á propia vida a través da recuperación dos fantasmas do pasado; e tamén da historia da transmisión da memoria dos vellos aos novos, da relación desesperada e urxente entre a vellez e a infancia”.
Rexina Vega é doutora en Filoloxía Románica coa tese Bilingüismo e autotradución en Álvaro Cunqueiro. Sobre este autor ten publicados numerosos artigos e estudos, entre os que salienta Álvaro Cunqueiro. Unha poética da recreación, premio Carballo Calero de investigación. Durante os anos noventa exerceu a docencia na área de filoloxía galego-portuguesa na Universitat Autònoma de Barcelona. Desde este ámbito desenvolveu unha intensa actividade de divulgación da cultura galega na sociedade catalá. Exerceu a crítica teatral na revista El Público e a crítica literaria para, entre outras publicacións, Quimera, Anuario de Estudos Galegos, Grial ou A Nosa Terra. Dentro do eido da lexicografía, ademais da publicación de artigos teóricos no Instituto Cervantes e en actas universitarias, traballou como redactora de numerosos diccionarios bilingües da editorial Larousse e no Diccionario Vox galego-castelán. É premio Sthendal, e finalista do premio nacional de tradución, pola obra de Georges Perec El secuestro. Responsabilizouse da edición dos artigos ensaísticos de Suso de Toro publicados por Xerais baixo o título Ten que doer. Literatura e identidade. Actualmente é Profesora asociada do departamento de lingua española na Universidade de Vigo e profesora de lingua e literatura galega no Instituto San Tomé da mesma cidade. Cardume é a primeira incursión na creación literaria desta autora.
Vídeo: O blog dos pelachos.
Premios Xerais: a colleita 2007
/en Literatura infantil e xuvenil, Narrativa, Premios, Xerais/por bretemasHoxe son numerosas as primeiras referencias na prensa dixital:
- Faro de Vigo: “Unha filóloga viguesa gañadora dos Xerais“.
- Faro de Vigo: “Rexina Vega: ‘Nunca esperei ter na primeira novela recoñecemento tan alto'”.
- Faro de Vigo: “Carlo López: Ás veces uso o truco de escribir para o neno que eu fun”.
- La Voz de Galicia: “A filóloga Rexina Vega logra o Xerais coa súa primeira novela“.
- La Voz de Galicia: “Rexina Vega: ‘É outra maldita novela sobre a guerra, pero non só'”.
- La Voz de Galicia: “Carlos López: ‘Non é o mesmo literatura infantil que literatura pueril'”.
- El Pais Galicia: “Rexina Vega gana el Xerais contada por una nieta de la Guerra“.
- Galicia hoxe: “Rexina R. Vega gañadora do Premio Xerais de novela con Cardume“.
- El Correo gallego: “A novela Cardume de rexina R. Vega faise co premio Xerais“.
- Vieiros: “Rexina Rodríguez gaña o Xerais cunha novela sobre a guerra civil“.
- Xornal: “Rexina Rodríguez, premio xerais cunha novela sobre a guerra civil“.
- El Ideal Gallego: “Rexina Vega, An Alfaya y Carlos López ganan los Premios Xerais“.
- El Progreso: “Rexina Vega obten o premio xerais de novela con Cardume“.
Días estranhos, O levantador de minas e o blog dos pelachos publicarán crónicas audiovisuais do abondoso material que gravaron.
A vida despois do Xerais
/en Premios, Xerais/por bretemasFaro de Vigo agasállanos no día do fallo dos nosos Premios con esta reportaxe.
Teresa Moure e Xabier Blanco nos Premios Xerais 2007
/en Premios, Xerais/por bretemas Teresa Moure e Xabier Blanco, o gaiteiro de Moaña, serán os dous artistas que participarán no acto de entrega dos Premios Xerais 2007 que se celebrará mañá na illa de San Simón.
Xabier interpretará cos seus instrumentos pobres tres temas: “Mata o porco Pepa” (vasoira e cazo), “Moendo” (gaita de cana) e “A miña roseira” (tubela, táboa de lavar e dedais).
Pola súa banda, Teresa lerá un discurso titulado “O carácter revolucionario da escrita e das palabras” do que recollemos apenas un parágrafo:
As palabras fermosas, como pexego, independencia ou liberdade, gardan intacto na súa musica o feitizo da suavidade e da rebeldía. As veces, as palabras amoréanse con fortuna, como cando cantan “Brindo polo amor e aposto polo verso” nesa ben-dita conxunción que coseu Ana Romaní. Porque, ante a nosa sorpresa, as palabras son quen de se amalgamaren até compoñer unha substancia tersa, melodiosa, menos tristeira e máis emblemática que a etimoloxía que lles deu a orixe, unha substancia anovada que, logo dun poderoso cambio químico, faise caldo, faise masa de comer, faise texto… e arde mal.”
Etiquetas: Premios_Xerais_2007
Updike, o adianto de "Terrorista"
/en Adiantos, Autores, Narrativa, Novidades, Traducións, Xerais/por bretemas Terrorista, a primeira obra en galego de John Updike, é a historia de Ahmad Ashmawy Mulloy, un mozo de dezaoito anos que vive en New Prospect, unha antiga vila industrial do estado de Nova Jersey. Fillo de nai irlandesa-americana e de pai exipcio, que os abandona cando non tiña mais que tres anos, Ahmad non soubo nunca atopar o seu lugar na sociedade na que vive. Furioso coa súa nai, por non ter conseguido manter unida a familia, adopta aos once anos a fe do pai, o islam, refuxiándose na influencia do xeque Rashid, o imán da mesquita da Rúa West Main. A pesar de contar cun grande potencial para os estudos, como lle recorda Jack Levy, o orientador do seu instituto, un xudeo renegado e infeliz que o aconsella ingresar na Universidade, decide obter o carné de condutor de camións para comezar a traballar de transportista, como lle recomenda o imán. É así como lle chega a proposta clave da súa vida: facer estourar un camión cargado con catro toneladas de dinamita nun dos principais tuneis de Nova York. Para Ahmad esta é unha misión elevada que o afastaría da superficialidade e o materialismo da cultura norteamericana que aborrece, un acto suicida que lle permitiría dar a vida por Alá.
John Updike (Shillington, Pensylvania, 1932), autor de máis de vinte novelas, é un dos escritores máis relevantes da narrativa norteamericana contemporánea. Crítico literario do The New Yorker dende 1957, obtivo os máis importantes premios literarios: o Pulitzer, o American Book Award, o National Book Award, o National Book Critics Circle Award, o Rosenthal Award e a Howells Medal. Terrorista (Xerais 2007) é a súa primeira obra traducida para o galego por Lara Domínguez Araújo e ilustrada na súa portada por Fran Herbello Hermelo. Aquí pode baixarse en PDF as primeiras páxinas da novela, que estará nas librarías na primeira quincena de xuño, coincidindo coa aparición das versións en castelán e catalán.
Updike, por vez primeira en galego
/en Autores, Narrativa, Novidades, Traducións, Xerais/por bretemasNa vindeira semana recibiremos os primeiros exemplares de Terrorista, a primeira novela de John Updike traducida ao galego, que aparecerá nas librarías ao mesmo tempo ca edición de Tusquets e Bromera. El Cultural (que como é adoito non anuncia as edición galega e catalana) publica esta interesante entrevista co moi respectado autor estadounidense. A tradución galega de Terrorista debeuse a Lara Domínguez Araújo e a portada ao fotógrafo Fran Herbello. Mañá publicaremos na web da editorial un adianto do primeiro capítulo.
Premios Xerais 2007, os finalistas
/en Premios, Xerais/por bretemasEtiquetas: Premios_Xerais_2007
Manuel Bragado Rodríguez (Vigo, 1959) é mestre, editor e activista cultural. Orientador do CEIP de Laredo e CEIP de Cedeira de Redondela, foi director de Edicións Xerais de Galicia S.A. (1994-2018).
Recomendo
Últimas anotacións
- Memoria da Terra Chá17 de Abril de 2024 - 10:12 a.m.
- Masa verde16 de Abril de 2024 - 9:51 a.m.
- Galician books10 de Abril de 2024 - 10:59 a.m.
- O descoñecido Carolo9 de Abril de 2024 - 10:47 a.m.
- Polavila Docampo3 de Abril de 2024 - 11:36 a.m.