Onte 256: A caridade de Rouco

Segundo o cardeal Rouco Varela, se a Igrexa se vise obrigada a pagar o IBI ás administracións locais polos seus edificios de culto, poderían diminuír ás súas accións sociais, singularmente a que desenvolve Cáritas. Non hai dúbida que o prelado vilalbés expresa con luva de veludo unha sutil ameaza ao Goberno de Rajoy, entendo que coa intención de que non se lle ocorra tomar nota da iniciativa do seu colega italiano que recentemente obrigou á igrexa católica a pagar impostos polos seus inmobles. A do IBI non é unha cuestión fiscalmente irrelevante, xa que, segundo estimacións da organización Europa Laica, o Estado español podería ingresar entre 2.500 e 3.000 millóns, unha cantidade equivalente aos últimos recurtes educativos. Este é outro dos privilexios fiscais dos que goza a igrexa católica, aos que habería que engadir a asignación que recibe pola vía do IRPF e os fondos que polo cadriño «social» do IRPF lle corresponden a Cáritas polo seu labor, por certo, valioso. En total 11.000 millóns de euros. Esta é a caridade que practica o cardeal Rouco, prefire que sexa toda a cidadanía quen pague as súas actividades! Como lembra o grupo parlamentario de IU: para cando queda a autofinanciación contemplada nos acordos de financiamento de 1979? E aínda din que vivimos nun estado aconfensional!