Manuel Bragado Rodríguez

Manuel Bragado Rodríguez (Vigo, 1959) é editor e mestre. Na actualidade, profesor do CEIP Lope de Vega de Vigo, foi Director Xeral de Edicións Xerais de Galicia S.A., dende o mes de xaneiro de 1994 ao de abril de 2018, empresa na que traballou dende 1990. Licenciado en Ciencias da Educación pola Universidade de Santiago (1976-1981), foi profesor da materia «Edición e actividade editorial» do Mestrado en Edición 2009/2010 das Universidades de Vigo e Santiago de Compostela.

É secretario da Asoicación Premios da Crítica de Galicia, membro do Instituto de Estudios Vigueses, do padroado da Fundación Celso Emilio Ferreiro , da sección de «Lingua, literatura e comunicación» do Consello da Cultura Galega, de ProLingua, de Nova Escola Galega e de Amnistía Internacional.

Foi presidente da Asociación Galega de Editores (2010-2014), de Culturgal (2014-2017), da asociación pedagóxica Nova Escola Galega (1986-88), director da Revista Galega de Educación (1986-2000) e redactor do documento «Lingua e edición» da ponencia de Lingua e Cultura do Proxecto Galicia 2010.

Colaborador de diferentes medios de comunicación, participou no consello de redacción d’ A Pizarra (suplemento de educación de Faro de Vigo, 1982-1986), Na escola (suplemento de educación de La Región e Atlántico diario, 1987-1989). Colaborador de Faro de Vigo, publica semanalmente, dende o mes de agosto de 1999 e de forma ininterrumpida, a sección «Campo de Granada», sobre actualidade socio-cultural de carácter local (937 artigos publicados até agosto de 2018), pola que obtivo o Premio Gómez Román (2000) convocado polo concello de Vigo e o premio de xornalismo Fernández del Riego 2014, así como tamén o espazo «Campo do Fragoso» de reflexión futbolística (211 artigos até abril de 2018) e a columna política «Brétemas» na revista Luzes.gal. Colaborador de Praza Pública, Galicia Confidencial, Sermos Galiza e da Radio Galega dende 2000, participou semanalmente e durante unha década na tertulia do programa informativo «A Crónica».

Dende 2005 mantén aberto o blog Brétemas (http://bretemas.gal) onde publica a serie «Onte» e onde realiza un seguimento de temas editoriais, literarios, políticos de actualidade, con especial atención á nova literacidade electrónica e aos futuros do libro. Conforma a súa identidade dixital cos seus espazos en Facebook, Twitter, Instagram e Pinterest. Por este traballo recibiu o Premio AELG Blog Literario 2010 e o Premio Fervenzas Literarias ao mellor blog dos anos 2009, 2010, 2011 e 2012.

Ten dirixido a elaboración e os proxectos didácticos de máis de catro centenares de libros de texto dirixidos á educación non universitaria; deseñou e dirixe varias colección de literatura e literatura infantil e xuvenil, publicou varios libros de carácter pedagóxico, estudos sobre o estado da edición en lingua galega e o libro para primeiros lectores Dona Carme (Ir Indo edicións, 1989). Algún día gustaríalle rematar o traballo «Historia das publicacións educativas en Galicia (1900-1980)», proxectado inicialmente como tese de doutoramento.