Onte 687: O valor das bibliotecas

As declaracións de María del Carmen Castellano Rodríguez, alcaldesa de Telde, nas que aseguraba que as bibliotecas do seu concello, nas que traballan catorce persoas, non daban cartos evidencian o escaso valor que algúns políticos conceden aos servizos públicos de lectura. Non hai dúbida que se na xestión das bibliotecas públicas se utilizasen só os criterios das políticas de consolidación fiscal ten toda a razón a señora Castellano, acabarían sendo pechadas. Porén, a realidade é ben diferente. A pesar da crise e das políticas de austeridade, as bibliotecas están transformándose nas primeiras institucións culturais de cada comunidade local. Hoxe os servizos públicos das bibliotecas xa non son só de préstamo de libros, discos e películas; transformáronse en centros de acceso gratuito a todo tipo de documentación, impresa ou dixital. As bibliotecas son os centros interxeracionais fulcrais de acceso á información e do fomento da lectura. Os datos amosan que desde 2007, cando comezou a crise, aumentou en todas as comunidades autónomas o número de usuarios das bibliotecas públicas nun 45%, mentres diminuíron moito máis os recursos destinados a actividades e adquisicións (neste 2013 o Ministerio de Cultura de José Ignacio Wert deixou esta partida a cero). Hoxe xa son moitas máis os socios e socias da rede de bibliotecas públicas que os do clubes de fútbol profesional, que, por riba, deben cantidades millonarias a Facenda. O valor das bibliotecas non se debe medir en cifras que expresen un balance de gastos e ingresos, mais si, pola contra, en termos de convivencia, civilidade, cohesión social e coñecemento. Nas bibliotecas públicas ocorren cada día cousas moi fermosas a millóns de persoas de todas as idades. Sabemos cal é o seu valor?

A foto é da extraordinaria biblioteca da Alhóndiga de Bilbao.