O tirón de Ameixeiras
Belén Regueira fixo este serán un magnífico exercicio de persuasión publicitaria na presentación da novela de Ameixeiras. Con grande convicción e moita graza aconsellou ler O cidadán do mes polas seguintes razóns:
- Ameixeiras é un autor que non pide aos lectores que sufran. “Este é un home que se esforzou por nós”.
- “A novela posúe unha banda sonora impresionante”.
- Ameixeiras (xa unha marca) é “o autor de culto dos membros dos grupos pop-rock galegos, da chamada xeración emerxente ou agromante”.
- As cousas que fai Ameixeiras sempre son divertidas.
- A novela é de grande utilidade: inclúe unha guía de bares e tapas de Chispatwon; permite incrementar o léxico amatorio; retrata parte de nosa realidade de forma máis fidedigna que outros autores nosos; expresa unha interesante cosmogonía de barra…
Despois das tres presentacións desta novela, que está tendo moi boa acollida entre os lectores (hai unha coincidencia xeralizada en que engancha fatalmente a quen a colla), non hai dúbida de que Ameixeiras é un dos nosos novos narradores con máis tirón entre os lectores. Agardamos xa a terceira entrega de Dopico; hoxe Diego prometeu tela rematada para o vindeiro ano.
Etiquetas: Narrativa, Ameixeiras, Regueira, Xerais
Parabéns ao Ameixeiras. O cidadán do mes é uma das cousas que esquecim traer da terra.
Saberia vostede alguma livraria em Madrid na que trabalhem Xerais?.
Obrigadinho.
A verdade é que collín O cidadán do mes (non lin Baixo mínimos) bastante escéptico é gocei coma un neno co libro! Noraboa a Ameixeiras por abrir unha nova vía na literatura galega e desanquilosar a negra!
El Niño de la guía: Creo recordar que na Casa do libro de Madrid se podían comprar libros de Xerais…